Ilinniartut Ineqarfiisa Allaffeqarfiat Kollegieadministrationens Fælleskontor
  1. Home
  2. Nuummi ilinniagaqarniarpit

Nuummi ilinniagaqarniarpit imaluunniit ilinniarninnut atatillugu atuagarsoriassavit?

Nuummi ilinnialerniaruit nammineq KAF-imut kollegianut inissarsiussaatit.

Pingaaruteqarpoq mobilnormu aammalu emailit nalunaarutiginissai, taakku ilinnut attaveqaataasussaammata.

Ilinniakkamut akuerisaanermut allakkat imaluunniit atuariartoqqussummik ilinniarfinniit tigugukkit aatsaat kollegiassannik qinnuteqarsinnaavutit.

Kollegianut qinnuteqartut KAF-imut akiitsoqarnersut misissoqqaarneqartarput. Akiitsoqaraannilu kollegianut qinnuteqaat suliarineqarsinnaaneq ajorpoq, akiitsut aatsaat akilerneqareeraangata. 

Kollegiassamik qinnuteqaatit sapaatip akunneri sisamat atualernissat sioqqullugu nassiutereersimassavat uunga: kafadm@kaf.gl imaluunniit immersugassaq uani immersoruk Sullissivik


KAF-ip ilinniartut ineqarfiinut inissarsiorluni qinnuteqarluni immersugassaataa atorneqassaaq. Qinnuteqaammut ilinnialernissamut uppernarsaat aammalu sumi najugaqartarsimanermut uppernarsaat (historisk bopælsattest) ilanngussaqassapput.

Qinnuteqaatit KAF-ip toqqaannartumik ilinnut allaganngorlugu mailinnut nalunaarutigissavaa, tunineqarnerlutit imaluunniit tunineqannginnerlutit.

Angalanissat qulakkeereerukku, KAF-imut ulloq Nuummut tikiffissat nalunaarutigissavat, tassunga ilanngullugu umiarsuaq sinersortaat imaluunniit timmisartoq ilaaffissavit normua ilanngullugu nalunaarutigalugu (GL-nr.), taammaalilluta tikinnissannut piareersimassaagut.

Erseqqissaatigissavarput ulloq iserterfissaq sioqqullugu Nuummut tikissaguit, nammineerlutit inissikkallarnissaq isumagissagakku.

Nuummut tikikkuit piaartumik Ilinniartut Ineqarfiisa Allaffeqarfianut ornigutissaatit, attartornermut isumaqatigiissut atsioriartorlugu aammalu inissannut matuersaat tigullugu. Ilinniartut tikikkaangamik KAF-imiit aaneqarneq ajorput.
Suliffiup kingorna tikissimaguit, qinnuigissavatsigit uunga oqarasuaammut sianeqqullutit KAF vagtmobil: 55 77 90.

Ilinniartut ineqarfiinut tunngasunik annertunerusumik paasisaqarusukkuit KAF-i attavigineqarsinnaavoq.

Malugeqqussavarput Ilinniartut Ineqarfiisa Allaffeqarfiat ilinniartunut inissaminnik qulakkeerinneqqaaratik tikittunut akisussaaffeqanngimmat.